Një efektiv policie është sulmuar me thikë ditën e sotme në Durrës. Mësohet se ngjarja ka ndodhur në lagjen numër 1 të qytetit bregdetar.
Një qytetar është shfaqur me thikë dhe ka goditur policin me thikë, por arsyet nuk dihen ende. Efektivi është transportuar në spitalin e qytetit për të marrë ndihmë mjekësore. Ndërkohë që agresori ndodhet në ambentet e policisë, duke u marrë në pyetje.
Durrës/Informacion paraprak
Rreth orës 11:00, Policia ka marrë njoftim nga qytetarët, se në lagjen nr. 1, një shtetas po lëviste në rrugë, me mjet prerës, në dorë, duke u bërë rrezik për kalimtarët.
Menjëherë, shërbimet e Policisë kanë shkuar në adresën e dhënë ku kanë konstatuar shtetasin F. C., duke mbajtur një mjet prerës (thikë), në dorë. Gjatë ndërhyrjes së shërbimeve të Policisë, për neutralizimin e këtij shtetasi, është dëmtuar lehtë në dorë, nga mjeti prerës, punonjësi i Policisë E. C., i cili po merr mjekim në spital dhe është jashtë rrezikut për jetën.
Shërbimet e Policisë e kanë shoqëruar shtetasin F. C., 38 vjeç, në Komisariat, për veprime të mëtejshme.
Mjeti prerës është sekuestruar në cilësinë e provës materiale.
Grupi hetimor po punon për sqarimin e rrethanave të rastit.
