Një 41-vjeçar me origjinë shqiptare është vrarë me armë zjarri në një vresht në zonën rurale të Rafinës në Greqi.
Viktima është identifikuar si Altin Arapaj, 41 vjeç, i cili është emër i njohur për policinë greke, për shkak të përfshirjes së tij në disa vepra penale. Ndërkohë mësohet se autori i dyshuar i krimit është gjithashtu me origjinë shqiptare dhe i njohur për autoritetet për përfshirje në raste droge.
Sipas informacioneve të para për mediat greke, para se të jepte frymën e fundit 41-vjeçari telefonoi bashkëshorten e tij, të cilës i zbuloi emrin e autorit që e qëlloi me armë zjarri.
Policia ka rrethuar zonën dhe ka nisur hetimet për zbardhjen dhe dokumentimin e plotë të ngjarjes, me qëllim identifikimin dhe kapjen e autorit të vrasjes.
Policia identifikon vrasësin
Pas dëshmisë së familjarëve të viktimës, është identifikuar autori i vrasës së 41-vjecarit shqiptar Altin Arapaj, sot në Rafina të Athinës.
Sipas burimeve policore, autori i dyshuar është Mikel Selimaj, 46 vjeç nga Vlora, person me precedentë penalë për drogë. Ka qenë vetë viktima, ai që ka arritur të telefonojë bashkëshorten e tij pas goditjes me armë, duke i thënë se autor ishte Mikel Selimaj.
Trupi i viktimës, Altin Arapaj, po nga Vlora, u gjet pas telefonatës në një vresht në Rafina, i goditur me plumb në faqe. Edhe ai rezulton me precedentë penalë në Greqi për vepra të ndryshme. Policia greke ka nisur një operacion të gjerë për kapjen e autorit.
