Wikipedia shqip ka arritur një moment historik: 100 mijë artikuj!
Ky rezultat i suksesshëm vjen si rrjedhojë e punës së palodhme dhe përkushtimit të qindra vullnetarëve që kanë kontribuar në rritjen dhe zhvillimin e kësaj platforme të dijes së lirë.
Në këtë rrugëtim të gjatë prej më shumë se 20 vitesh me sfida e suksese, komuniteti shqiptar në Wikipedia ka treguar forcën dhe pasionin për të ndarë dijen e lirë dhe për ta bërë të qasshme te të gjithë njerëzit. Me tema te ndryshme, artikujt në Wikipedia shqip po bëhen dita-ditës një burim i rëndësishëm për shqiptarët dhe për cilindo që dëshiron të mësojë më shumë.
Wikipedia është enciklopedia e lirë që secili mund ta redaktoj. Wikipedia në anglisht ka 6.8 milionë artikuj ndërsa të gjitha gjuhët së bashku rreth 68 milionë dhe në ngritje.
Përveç artikujve në shqip, komuniteti shqiptar kontribuon edhe në anglisht dhe gjuhët tjera, si dhe në projektet simotra: repozitorin multimedial Wikimedia Commons, bazën e lirë të dijes Wikidata etj.
Në emër të gjithë komunitetit të Wikipedia-s shqip, ju falënderojmë për mbështetjen tuaj. I ftojmë të gjithë pasionantët e dijes së lirë të na bashkangjiten që 100 mijë artikujt e ardhshëm të arrihen edhe më shpejtë. Së bashku, ndërtojmë një burim të vlefshëm për brezat e ardhshëm!
