Sot ka mbetur i plagosur rëndë nga shpërthimi i tritolit në Vlorë, 33 vjeçari Endrit Sadedinaj.
Shpërthimi i fuqishëm ndodhi pranë automjetit te tij në një garazh në lagjen “10 korriku” të qytetit të Vlorës.
Pas shpërthimit, Sadedinaj shihej i shtrirë përtokë nga plagët e marra. Mësohet se ai kishte konflikte të mëparshme, pasi në 2017 në lokalin e tij u tentua një atentat nga 7 persona.
Asokohe gjatë dëshmisë para hetuesve, Sadedini ka thënë se nuk e ka idenë kush mund ta ketë vendosur eksplozivin dhe nuk dyshonte tek askush.
Në prill të 2017 në lokalin që ai kishte në zotërim u vra një person dhe u plagosën tre të tjerë.
Në atë kohë, Sadedini u procedua në gjendje të lirë nga policia për moskallëzim krimi dhe që prej atëherë e ka lënë lokalin me qira.
Nuk dihet nëse vendosja e tritolit në 2017 kishte lidhje me ngjarjen e prillit.
Sot pas 4 vitesh atij i është kryer një tjetër atentat, tashmë në momentin që ai parkoi makinën poshtë pallatit ku jetonte.
Mësohet se ai është në gjendje të rëndë shëndetësore dhe i janë prerë të dy gjymtyrët e poshtme nga shpërthimi. Grupi hetimor po punon për zbardhjen e plotë të ngjarjes.
Njoftimi i policisë:
Vlorë/Informacion paraprak.
Më datë 18.12.2021, rreth orës 15:10, në lagjen “10 Korriku”, jashtë një pallati ka shpërthyer në rrethana ende te paqarta një sasi lënde, dyshohet eksplozive e për pasojë është dëmtuar shtetasi I.S., i cili ndodhet në gjendje të rëndë.
Shërbimet e policisë kanë shkuar menjëherë në vendngjarje dhe po punojnë për zbardhjen e rrethanave të ngjarjes.
