SHTERMEN – Europiani për të rinj, i zhvilluar në Varshavë të Polonisë, i solli Shqipërisë një tjetër kampion Europe, 3 medalje ari nga 17-vjeçari Ertjan Kofsha, që ngriti sërish lart flamurin shqiptar. Si për ironi dhe koicidencë, është sërish fshati Shtërmen, ai i cili nxjerr një tjetër kampion, nën gjurmët e Briken Caljes, nga e njëjta dhe e vetmja palestër e trajnerit Leonard Toska.
“Kemi marrë shumë medalje, me Brikenin me Geraldin, me Ertjanin dhe Klausin kemi marrë dy medalje në Itali. Këto janë medaljet e rradhës, pas një kohe të gjatë që ishim shkëputur, por besoj se Shtërmeni nuk do t’i ndahet medaljeve”.
Po cili është çelësi i suksesit të këtij fshati, që prodhon kampionë në peshëngritjeje?
“Puna, disiplina, serioziteti në punë, asnjë ditë nuk shkëputemi nga palestra, asnjë ditë, duke ndenjur korrekt dhe duke zbatuar programet, çdo sportist ka programin të varur në mur”
Si e ka filluar karrierën ky sportist i ri, që për specialistët ka pritshmëri të mëdha?
“Në fillimet e mia ka qenë Briken Calja këtu në palestër dhe unë qëndroja duke e parë dhe duke mësuar prej tij”.
Për të arritur këto suksese duhet shumë punë dhe Ertjani tregon se sakrifikon edhe shkollën për të mos munguar në palestër.
“Paradite shkoj në shkollë, por ka ditë që edhe marr leje në shkollë dhe në bashkëpunim me shkollën, dy ose tre here në javë marr leje për të zhvilluar nga dy seanca në ditë stërvitje”.
Pas Briken Caljes dhe Erkand Qermajt dukej se do të vononin emrat e rinj të sportistëve të suksesshëm në sportin e peshëngritjes, por Kofsha është një prej elementëve të brezit më të ri që premton.
“Si fillim dua të përgëzoj të dy sportistët që morën medalje edhe Enkeledën 14-vjeçare, por edhe Ertjanin dhe të dy trajnerët për punën që kanë bërë. Kjo punë dhe ky model duhet t’i shërbejë të gjithë trajnerëve dhe klubeve të tjera. Strategjia jonë është që me këta sportiestë të rinj të fillojmë gërshetimin e brezave, pa hequr vëmendjen nga Brikeni dhe Erkandi,”- shprehet Elez Gjoza, presidenti i Federatës Shqiptare të Peshëngritjes.
