DURRËS- Një 39-vjeçar është proceduar penalisht në Durrës pasi tentoi të nxirrte para ilegalisht nga Shqipëria. Gjatë kontrolleve të imtësishme u zbulua se Eridan Fejzaj kishte me vete 9670 euro dhe 3345 paund të cilat nuk i kishte deklaruar.
Më tej në njoftimin e policisë bëhet me dije se paratë janë sëkuestruar dhe rasti është vënë në hëtim për veprën penale “Mosdeklarimi në kufi i të hollave dhe i sendeve me vlerë”.
Njoftimi i policisë:
PKK Port, Durrës/Goditet një tjetër rast i mosdeklarimit të shumave të konsiderueshme të parave, në pikën e kalimit kufitar. Vihet në pranga shtetasi Eridan Fejzaj. Sekuestrohen 9670 euro dhe 3345 paund, të padeklaruara konform ligjit në fuqi. Procedohet penalisht 39-vjeçari që tentoi t’i nxirrte paratë nga Shqipëria, ilegalisht.
Shërbimet e Policisë Kufitare të portit të Durrësit, në vijim të kontrolleve në hyrje/dalje, të bazuara në analizën e riskut, me fokus parandalimin dhe goditjen e paligjshmërive kufitare, në dalje të Republikës së Shqipërisë, kanë kaluar në vijën e dytë, për kontroll të imtësishëm, shtetasin E. F.. Nga kontrolli fizik, këtij shtetasi iu gjetën 9670 euro dhe 3345 paund që tentonte t’i nxirrte nga vendi ynë, pa i deklaruar në pikën e kalimit kufitar.
Në vijim të veprimeve procedurale për këtë rast, nisi procedimi në gjendje të lirë për shtetasin E. F., 39 vjeç, banues në Vlorë, si dhe u sekuestruan në cilësinë e provës materiale, shumat e parave. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme, për veprën penale “Mosdeklarimi në kufi i të hollave dhe i sendeve me vlerë”.
