Një nuse është arrestuar në ditën e saj të dasmës në Meksikë, pasi akuzohej për një skemë zhvatjeje që përfshinte bashkëshortin e saj të mundshëm dhe gjashtë të dyshuar të tjerë.
Gruaja, e identifikuar vetëm si Nancy N., u arrestua muajin e kaluar teksa po përgatitej për t’u martuar me bashkëshortin e saj, një tjetër i dyshuar për zhvatje i identifikuar si Clemente N. Megjithatë, autoritetet nuk ishin në gjendje të kapnin dhëndrin i cili quhet ndryshe “Miu”.
Çifti ishte pjesë e një grupi të akuzuar për zhvatjen e tregtarëve të pulave në Toluca pranë Mexico City dhe të dyshuar për rrëmbimin e katër punëtorëve nga një dyqan shpendësh në Toluca. Një nga tetë të dyshuarit e arrestuar, i identifikuar si Santiago N., u akuzua për drejtimin e një kamioni për të transportuar viktimat e rrëmbyera.
Zyra e prokurorit postoi fotografi të të dyshuarve të përfshirë në skemën e zhvatjes si dhe një video që tregon Nancy N në pranga, ende të veshur me fustanin e nusërisë, si dhe foto të provave të siguruara.
Të dyshuarit thuhet se kanë lidhje me kartelin e drogës La Familia Michoacana. Në fillim të këtij muaji, i njëjti kartel u fajësua për një sulm me dron në shtetin jugor të Guerrero, që la të paktën gjashtë persona të vdekur. Autoritetet thonë se bandat rivale kanë luftuar për kontrollin e zhvatjeve në rajon. Ata thonë se mosmarrëveshja u rrit korrikun e kaluar kur mbetjet njerëzore dhe shënimet paralajmëruese u gjetën në Toluca. Prokuroria arrestoi më pas 11 anëtarë të një bande kriminale të njohur si “ElPecha.”