• Kosova është tronditur nga vdekja e tre të miturve në Gjakovë, të cilët humbën jetën dje nga shembja e një objekti të pabanuar në Jabllanicë. • Mediat në Kosovë kanë publikuar pamjet nga kamerat e sigurisë, ku shihet momenti i shembjes së objektit të pabanuar. • Shembja e objektit ka ndodhur rreth orës 16:35, ndërsa trupat e të miturve janë gjetur në rrënoja pas rreth katër orëve. • Këtë e konfirmoi edhe Përparim Ademaj, familjar i tre fëmijëve, i cili tha se trupat e pajetë i gjetën pas rreth katër orësh kërkim. • Policia tha në njoftim se objekti është shembur në rrethana të panjohura, ndërsa tre djemtë, dy prej tyre 15 vjeç dhe tjetri 14 vjeç, ishin brenda kur u zunë nga pllaka. • Oficeri i i Policisë, Milazim Lumi tha se objekti kishte mbetur i pabanuar që prej luftës më 1999. • Lidhur me këtë rast tragjik kanë reaguar krerët e partive politike, ku kanë shprehur ngushëllimet familjarëve dhe kanë kërkuar hetim të plotë të rrethanave të ngjarjes së rëndë. • Presidentja Vjosa Osmani i ka shprehur ngushëllime familjarëve të të miturve, të cilët thotë se sot përballen me boshllëkun e pafund që lë pas humbja e më të dashurve të tyre.

Dinamika orë pas ore

Vdekja e tre të miturve në Gjakovë/ Reagojnë politikanët në Kosovë: Lajm tragjik! Organet kompetente të zhvillojnë hetim të plotë për rrethanat e ngjarjes

GJAKOVË- Politikanët në Kosovë kanë reaguar lidhur me vdekjen e tre të miturve në Jabllanicë të Gjakovë si pasojë e shembjes së një objekti të pabanuar.

Presidentja Vjosa Osmani i ka shprehur ngushëllime familjarëve të të miturve, të cilët thotë se sot përballen me boshllëkun e pafund që lë pas humbja e më të dashurve të tyre.

“Me zemër të rënduar dhe dhimbje të thellë morëm lajmin tragjik për humbjen e jetës së tre fëmijëve në Jabllanicë të Gjakovës, të cilët u shuan para kohe si pasojë e rrënimit të një objekti të pabanuar. Nuk ka fjalë që mund ta lehtësojë dhimbjen e familjeve që sot po përballen me boshllëkun e pafund që lë pas humbja e më të dashurve të tyre. Në këtë moment të rëndë pikëllimi, ndajmë me ju dhembjen e papërshkrueshme, duke shprehur ngushëllimet e sinqerta dhe duke qëndruar pranë jush me mendje e zemër. Shpirtrat e tyre të njomë u prehshin në paqe!”, thuhet në postimin e Osmanit.

Kryetari i Lidhjes Demokratike të Kosovës, Lumir Abdixhiku gjithashtu u ka shprehur ngushëllime familjeve të tre fëmijëve. Në reagimin e LDK-së, Abdixhiku kërkon që organet kompetente të zhvillojnë hetim të plotë dhe të shpejtë për të sqaruar rrethanat e kësaj tragjedie.

“Me rastin e ngjarjes tragjike në Jabllanicë të Gjakovës, ku humbën jetën tre fëmijë, kryetari i LDK-së, Lumir Abdixhiku ju shpreh ngushëllime familjeve dhe qëndron me ta në këto momente të rënda.

‘Me dhimbje e pikëllim të thellë morëm lajmin tragjik për humbjen e tre fëmijëve në tragjedinë në Jabllanicë të Gjakovës.
Në emër të gjithë anëtarësisë së LDK-së, ju shpreh ngushëllimet e sinqerta familjeve, ndërsa në këto momente të vështira, qëndrojmë pranë tyre dhe lutemi që ta përballojnë këtë humbje të madhe. Po ashtu lus që të gjitha organet kompetente të zhvillojnë hetim të plotë dhe të shpejtë për të sqaruar rrethanat e kësaj tragjedie.'”, thuhet në postimin e LDK-së.

Kryetari i Aleancës për Ardhmërinë e Kosovës, Ramush Haradinaj, ka reaguar lidhur me rastin tragjik në Gjakovë, ku i ka shprehur ngushëllime familjeve të viktimave.

“I tronditur nga tragjedia në Jabllanicë të Gjakovës. Bashkëndjejmë me familjet Rama, Mehmeti e Morina, që humbën fëmijët. Zoti ju lehtësoftë dhembjen.”, thuhet në reagimin e tij.

Kryetari i Kuvendit të Kosovës, Glauk Konjufca ka kërkuar po ashtu që sa më shpejt të kryhet hetim i imtësishëm dhe i tërësishëm i rastit. Konjufca shprehet se këto janë momente të vështira për familjarët e të miturve dhe gjithë shoqërinë.

“Është e dhimbshme dhe e papërshkrueshme humbja e jetëve të tre të miturve në Jabllanicë të Gjakovës. Bëj thirrje që në kohën sa më të shpejtë të kemi hetim të imtësishëm e të tërësishëm të rastit. Shpreh ngushëllimet e mia për familjarët që humbën më të dashurit e tyre, në këto momente jashtëzakonisht të vështira për ta dhe gjithë shoqërinë tonë, duke u lutur që të gjejnë forcën për ta përballuar këtë humbje kaq të madhe!”, thuhet në reagimin e Konjufcës.

Kryetari i PDK-së, Memli Krasniqi ka thënë se në këto momente zie, jemi pranë familjeve të vitktimave.

“Dhembje e pafund për vdekjen tragjike të tre fëmijëve në Jabllanicë të Gjakovës. Në këto momente zie, jemi pranë familjeve të tyre me zemër e mendje, për të ndarë dhembjen e tyre të madhe. Ngushëllimet më të sinqerta për të gjithë. Zoti ju dhashtë forcë për ta përballuar këtë humbje të rëndë”, ka shkruar Krasniqi në reagimin e tij.

Tragjedia në Kosovë/ Dalin pamjet e shembjes së objektit që zuri poshtë të miturit, flet familjari i tyre: I kemi gjetur pas katër orësh nën rrënoja

KOSOVË- Kosova është tronditur nga vdekja e tre të miturve të cilët humbën jetën nga shembja e një objekti të pabanuar në Jabllanicë të Gjakovës.

Mediat në Kosovë kanë publikuar edhe pamjet nga kamerat e sigurisë, ku shihet momenti i shembjes së objektit të pabanuar. Nga këto pamje shihet se shembja e objektit ka ndodhur rreth orës 16:35, ndërsa trupat e të miturve janë gjetur në rrënoja pas rreth katër orëve.

Këtë e konfirmoi edhe Përparim Ademaj, familjar i tre fëmijëve, i cili tha se trupat e pajetë i gjetën pas rreth katër orësh kërkim.

“Kjo tragjedi ka ndodhë në këtë objekt të pabanueshëm. Rreth orës 10 e gjysmë në mbrëmje. Më herët kanë dalë si rinia tu lujtë, shokë”, tha ai në një prononcim për Indeksonline.

“Kur kemi kuptu që janë këtu, i kemi thirrë Policinë. Kanë ardhë Policia shumë shpejt, zjarrfikësit, ambulanca. I kemi gjetë pa shenja jete diku pas 4 orësh”, tha ai.

Policia tha në raportin 24-orësh se objekti është shembur në rrethana të panjohura, ndërsa tre djemtë, dy prej tyre 15 vjeç dhe tjetri 14 vjeç, ishin brenda kur u zunë nga pllaka.

“SHKAKTIM I RREZIKUT TË PËRGJITHSHËM- Jabllanicë, Gjakovë 01.02.2025-23:00. Raportohet se në rrethana të panjohura është shembur një objekt, dhe si pasoj tre viktimat meshkuj kosovarë të mitur të cilët kanë qenë duke qëndruar brenda saj janë zënë nga pllaka. Në vendin e ngjarjes kanë dal të gjitha njësitet përkatëse, ndërsa ekipi mjekësor ka konstatuar vdekjen e viktimave. Me vendim të prokurorit, trupat e pa jetë janë dërguar në IML për obduksion.”, thuhet në raportin policor.

Oficeri i i Policisë, Milazim Lumi tha se objekti kishte mbetur i pabanuar që prej luftës më 1999. Lidhur me këtë rast tragjik kanë reaguar krerët e institucioneve dhe partive politike, duke kërkuar hetim të plotë.

E rëndë në Kosovë/ I zu poshtë banesa e shembur, humbin jetën tre fëmijë të mitur

KOSOVË- Një ngjarje e rëndë ka ndodhur në Kosovë, ku tre fëmijë kanë humbur jetën si pasojë e shembjes së një objekti të pabanuar në fshatin Jabllanicë së Gjakovës.

Lajmin e ka konfirmuar Sheremet Elzaj nga Policia e Gjakovës, ku ka bërë me dije se banesa e shembur ka zënë poshtë tre fëmijë, të cilët kanë ndërruar jetë në vendin e ngjarjes. Viktimat raportohet se janë dy 15-vjeçarë dhe një 14-vjeçar.

“Më datë 1 shkurt 2025, rreth orës 22:50, jemi njoftuar se në fshatin Jabllanicë është rrëzuar pllaka e një shtëpie të pabanuar, duke zënë poshtë tre fëmijë. Në vendngjarje kanë dalë njësitë e nevojshme policore, si dhe ekipet e emergjencës, përfshirë ambulancën dhe zjarrfikësit. Lidhur me rastin, është njoftuar edhe prokurori i shtetit në koordinim me të cilin, aktualisht janë duke u ndërmarr veprimet e nevojshme hetimore”, ka thënë Elezaj.