Prej disa ditësh po flitet për një aplikacion të ri të krijuar nga Partia Socialistë, që thuhet se do të shërbejë për të kontrolluar punonjësit e administratës dhe ndihmën që ata japin për zgjedhjet e ardhshme. Aplikacioni quhet “Aktiv1st” dhe mund të shkarkohet nga të gjithë ata që kanë një celular të zgjuar.

Qeveria është munduar ta kamuflojë këtë platformë si një inovacion për të gjithë ata që duan që zëri i tyre të dëgjohet në shoqëri, por qëllimi i vërtetë është krejt ndryshe. “Aktiv1sti” është një aplikacion që do të kontrollojë çdo veprimtari të punonjësve të administratës, një mision që deri më tani ishte mjaft i vështirë.

Në këtë aplikacion, përdoruesit do të marrin njoftime për mitingje, mbledhje apo postime që bëjnë krerët e partisë dhe më pas ata duhet të vihen në lëvizje për të komentuar, pëlqyer apo shpërndarë postimet në fjalë ose në të kundërt për të shkuar dhe për tu paraqitur nëpër takime elektorale.

Akoma më alarmante e bën situatën fakti që në bazë të aktivitetit që përdoruesit shfaqin në këtë aplikacion, do të ketë edhe një sistem pikëzimi, që do të nxjerrë “patronazhistin” më të devotshëm, teksa mbetet për tu parë se cili do të jetë shpërblimi në fund. Me siguri ndonjë vend pune nga ata që paraqitesh një herë në muaj sa për tu dukur.

Prezantimi i platformës në Google Play dhe App Store: Kjo platformë e Partisë Socialiste të Shqipërisë, i jep mundësinë çdo personi që ka ide dhe dëshirë, të jetë pjesëmarrës në gara lokale ose kombëtare, të çojë përpara nismat e tij, si dhe të jetë një faktor aktiv në komunitetin ku jeton. Aktiv1st është një platformë inovatore, e thjeshtë për tu përdorur nga të gjithë ata që duan të bëhen një zë në shoqëri, duan të jenë nismëtarë ose mbështetës të kauzave në komunitetet e tyre. Platforma është një hapësirë e përbashkët inovative që vlerëson angazhimin dhe iniciativën, si dhe i jep zërin e duhur atyre që duan të kontribuojnë më shumë për të mirën e përbashkët, në nivel lokal dhe kombëtar. Në zemër të aktivizmit politik, në vetëm 3 hapa.

Hap profilin tënd dhe bëhu pjesë e një komuniteti virtual, i cili nëpërmjet një sistemi transparent të pikëzimit, vlerëson iniciativën dhe dëshirën për të angazhuar individë me interesa të ngjashme për të arritur më shumë dhe për të çuar përpara kauza të caktuara. Aktiv1st mbështetet tek një sistem pikëzimi, i cili ndërveprimet me platformën on-line i përkthen në një vlerësim të pasqyruar në “leaderboard”, sipas të cilit do të vlerësohen dhe individët, të cilët shfaqin më shumë iniciativë. Ky aplikacion mundëson që përdoruesi të ushtrojë aktivizmin dhe të informohet në kohë reale, në të njëjtën hapësirë virtuale. Platforma përfshin dhe një seksion për lajme, duke u bërë një kanal të mirëfilltë informimi, ku lajmet ngarkohen në kohë reale, në mënyrë që përdoruesit të jenë të azhornuar me gjithë zhvillimet e fundit nga politika dhe jo vetëm.