Prishtinë, 9 maj 2025 – Një krim i rëndë brenda familjes ka ndodhur pasditen e sotme në Prishtinë, ku një burrë ka plagosur gruan e tij me thikë dhe më pas ka kryer vetëvrasje.
Ngjarja ndodhi rreth orës 15:08 në rrugën “B”, pranë ordinancës stomatologjike “Alba Dent”, ku sipas burimeve policore, Festim Isufi ka sulmuar me thikë bashkëshorten e tij, R.I., 31 vjeç. Gruaja ka pësuar një plagë në dorë dhe është dërguar menjëherë për trajtim mjekësor. Fatmirësisht, ajo është jashtë rrezikut për jetën.
Pak çaste pas incidentit, Policia ka zbuluar trupin e pajetë të Festim Isufit në banesën e tij në rrugën “B”, tek ndërtesa “Dervisholli”, kati i gjashtë, hyrja 18. Mjekët në vendngjarje kanë konstatuar vdekjen e tij, ndërsa dyshohet se ai i ka dhënë fund jetës pas aktit të dhunshëm.
Të gjitha njësitë relevante policore dhe hetimore janë angazhuar në të dyja lokacionet për të hetuar motivet dhe rrethanat e ngjarjes, që sipas të dhënave paraprake, ka të bëjë me një rast dhune në marrëdhënie intime që ka përfunduar tragjikisht.
Hetimet janë në vijim, ndërsa pritet një reagim zyrtar nga autoritetet për të hedhur më shumë dritë mbi këtë rast tronditës.
