Fier, 9 Gusht 2025 – Një akt heroik është shënuar mbrëmjen e djeshme në zonën e “Qafës së Koshovicës”, ku një aksident rrugor mund të kishte përfunduar në tragjedi, nëse nuk do të ishte për ndërhyrjen e menjëhershme të një efektivi të Policisë Rrugore.
Klajdi Mustaj, 26 vjeç, inspektor i Policisë së Fierit prej shkurtit 2024, ndodhej pranë vendit të ngjarjes kur një automjet humbi kontrollin dhe doli nga rruga, duke u përmbysur me tre persona brenda. Mjeti nisi të nxjerrë tym të dendur, duke krijuar rrezik të madh për shpërthim.
Pa humbur kohë, Mustaj vrapoi drejt makinës, ndihmoi të aksidentuarit të dilnin dhe mori në krahë një prej tyre, duke e larguar në një vend të sigurt. Gjatë shpëtimit, inspektori pësoi lëndime në këmbë, por nuk u tërhoq deri sa të gjithë u nxorën jashtë rrezikut për jetën.
Për këtë veprim të jashtëzakonshëm, ka reaguar edhe Drejtori i Përgjithshëm i Policisë së Shtetit, Ilir Proda, me këtë mesazh publik:
Mesazhi i Drejtorit të Përgjithshëm Ilir Proda:
“Veprimi i Inspektor Klajdi Mustaj tregon më së miri misionin e Policisë së Shtetit: të jemi aty ku qytetarët kanë më shumë nevojë për ne. Guximi, profesionalizmi dhe reagimi i shpejtë i punonjësit tonë në shpëtimin e tre bashkëqytetarëve është shembull frymëzues për të gjithë trupën policore. I shpreh mirënjohjen time dhe të gjithë Policisë së Shtetit për këtë akt human e profesional. Faleminderit për guximin dhe zemrën e madhe që tregove në shërbim të qytetarëve.
Angazhimi, përkushtimi, profesionalizmi, sakrifica, ndershmëria dhe humanizmi duhet të jenë motoja jonë në përmbushjen e detyrës, fytyra dhe imazhi i ri i Policisë së Shtetit.”
Klajdi Mustaj është pjesë e Policisë së Shtetit prej shkurtit 2024, kur përfundoi Kolegjin Profesional për Patrullë të Përgjithshme. Ai ka përfunduar studimet për Shkencat Juridike (Bachelor) dhe aktualisht ndjek studimet për Master.
Ky akt trimërie është një shembull i qartë se uniforma mund të jetë shumë më tepër se një detyrë – është një mision human në shërbim të jetës.
