Nuk ndalet zemërimi i qytetarëve grekë për një nënë që dyshohet se ka vrarë tre vajzat e saj.
33-vjeçarja doli sot para Gjykatës së Athinës.
Roula Pispirgou akuzohet për vrasjen e vajzës së saj 9-vjeçare Georgina, por edhe dy vajzat e tjera të saj, Irisi shtatëmuajshe dhe Malena 3 vjeç e gjysmë kanë ndërruar jetë në rrethana të paqarta. Mediet greke raportojnë se në ambientet e jashtme të Gjykatës në Athinë, ditën e sotme ishte mbledhur një turmë e madhe qytetarësh, të cilët brohorisnin kundër nënës 33-vjeçare.
“Vdekje, vdekje, vdekje”, ishin fjalët e turmës jashtë Gjykatës.
Të indinjuar dhe të tronditur nga detajet rrëqethëse që dalin dita ditës nga rasti shokues, qytetarët grekë kërkojnë që Roula Pispirgou të vuajë dënimin maksimal për krimin makabarë që dyshohet të ketë bërë kundrejt vajzave të saj. 33-vjeçarja pritet të mohojë vrasjen me dashje dhe akuzën se i ka dhënë së bijës ketaminë, duke fajësuar mjekët.
Nga hetimet doli se në gjakun e vogëlushes, një prej tre vajzave të familjes nga Patra që humbën jetën papritur është gjetur ketamine. Ishin pikërisht këto rezultate që vunë në lëvizje hetuesit e rastit duke zbërthyer ngjarjen dhe duke nxjerrë zyrtarisht urdhrin e arrestit për nënën.
Mjekët thanë se nuk i kanë dhënë kurrë asnjë ilaç Georginës së vogël që përmban substancat e gjetura në testin toksikologjik të kryer pas vdekjes së fëmijës. Kjo i hap rrugën hetimit për dy vajzat e tjera që humbën jetën në rrethana misterioze dhe me shumë pikëpyetje.
Ketamina është një substancë që përdoret kryesisht në mjekësinë veterinare si anesteziko-qetësues i shpejtë, por në doza të vogla ka efekte psikoaktive dhe përçarëse.