Prej disa ditësh Policia e Shtetit ka goditur grupe dhe persona që administronin aktivitetet të paligjshme të lojrave të fatit. Edhe pse në vendin tonë prej kohësh , bastet sportive janë ndaluar me ligj, përseri në disa zona lulëzon basti ilegal, ku shpesh persona të ndryshëm gjejnë ambiente të marra me qera, ku shumica evidentohen si ish-lloto, nga ku organizohen baste sportive fshehurazi nëpërmjet celularëve.
Këtë e herë janë prangosur 2 pronarë lokalesh në Lezhë të cilët organizonin këtë aktivitet, ku me anë të aplikacioneve celularë kryenin veprimet e paligjshme të bastit.
Atyre iu gjetën 6 aparate celularë, 5 makineri elektronike lojrash fati dhe një shumë parash
Njoftimi i policisë:
Lezhë
Vijon operacioni “Fati i lojërave”. Organizonin lojëra fati nëpërmjet celularëve, vihen në pranga 2 administratorë subjektesh. Sekuestrohen 5 pajisje elektronike për lojëra fati, 6 aparate celular dhe një shumë parash.
Në vijim të kontrolleve të pandërprera në të gjithë qarkun Lezhë, në zbatim të planit të masave për evidentimin dhe ndëshkimin ligjor të veprimtarisë së kundërligjshme të lojërave të fatit, bazuar dhe në informacionet e marra në rrugë operative, shërbimet e Policisë Lezhë kanë konstatuar në lagjen “Skënderbeg”, Lezhë, 2 subjekte (lokale) ku ushtrohej aktiviteti i paligjshëm i lojërave të fatit.
Në vijim të veprimeve, specialistët e Krimit Ekonomik e Financiar bënë arrestimin në flagrancë të administratorëve të subjekteve, shtetasve: Idriz Kaloçi 38 vjeç dhe Meqan Mlika, 27 vjeç, banues në lagjen “Skënderbeg” , Lezhë. Këta shtetas janë kapur në flagrancë nga shërbimet e Policisë, në ambientet e subjekteve të tyre, duke ushtruar aktivitetin e paligjshëm të lojërave të fatit, me anë të aplikacioneve në celularë.
Materialet i kaluan Prokurorisë së Rrethit Gjyqësor Lezhë, për veprime të mëtejshme, për veprat penale “Organizimi i lotarive të palejuara”, “Vënia në dispozicion e lokaleve për lojëra të palejuara”, “Fshehja e të ardhurave” dhe “Mospagimi i taksave dhe tatimeve”.
Kontrollet kundër aktivitetit të lojërave të fatit do të vijojnë në të gjithë qarkun dhe në këtë kuadër Policia e Lezhës fton cilindo të denoncojë në numrin 112 ose përmes aplikacionit “Komisariati Dixhital”, çdo veprimtari të tillë të
kundërligjshme, duke iu siguruar anonimatin dhe reagim të paanshëm kundrejt shkelësve të ligjit.

LEAVE A REPLY

Please enter your comment!
Please enter your name here