Një i ri anglez goditi me thikë për vdekje vëllain e tij më të vogël në kopshtin e pasmë të shtëpisë së nënës së tyre, pas një zënke për qenin e familjes. Pamjet rrëqethëse janë publikuar në mediat e huaja dhe tregojnë William Campbell, 26 vjeç duke u arrestuar pasi goditi me thikë në gjoks vëllain Samuel, 24 vjeç.

Policia dhe stafi mjekësor shkuan drejt shtëpisë në Silksworth, Sunderland, ku gjetën Samuelin të shtrirë në një pellg gjaku.

Pamjet e kamerave tregojnë Campbell duke pranuar me qetësi se e goditi me thikë vëllain e tij “nga inati”. Në mënyrë të çuditshme, ai më pas pyeti oficerin për “protokollin” e arrestimit të tij. “E godita me thikë nga inati”.

Polici i përgjigjet: “Je i arrestuar”. Campbell pyet: “Çfarë nënkupton kjo? Unë e kuptoj protokollin, por çfarë përfshin kjo? Çfarë duhet të bëj?”

Në pamjet, mund të dëgjohen mjekët që përpiqen të shpëtojnë vëllain e tij, i cili më vonë u shpall i vdekur në vendngjarje.